Texas,તા.09
કોંગ્રેસ સાંસદ રાહુલ ગાંધી ત્રણ દિવસીય અમેરિકાના પ્રવાસે છે. અહીં તેમણે ટેક્સાસના ડલ્લાસ ખાતે યુનિવર્સિટી ઓફ ટેક્સાસના વિદ્યાર્થીઓ સાથે મુલાકાત કરી હતી. આ કાર્યક્રમમાં તેમણે અનેક મુદ્દાઓ પર વાત કરી હતી.
કયા કયા મુદ્દાઓ પર પ્રતિક્રિયા આપી..?
દેશની બેરોજગારી સમસ્યાથી લઈને ભગવાન સુધી કોંગ્રેસના સાંસદે અલગ-અલગ મુદ્દાઓ પર પોતાની પ્રતિક્રિયાઓ શેર કરી. આ દરમિયાન તેમણે ભારત જોડો યાત્રા અને ભારત જોડો ન્યાય યાત્રા પર પણ પોતાની પ્રતિક્રિયા આપી હતી. તેણે જણાવ્યું કે તેને આ યાત્રા શા માટે કરવાની જરૂર પડી.
ભારતમાં વાતચીતના તમામ રસ્તા બંધ કરાયા હતા : રાહુલ ગાંધી
ભારત જોડો યાત્રાની શરૂઆત અને તેની પાછળનું કારણ જણાવતા રાહુલ ગાંધીએ કહ્યું કે દેશમાં વાતચીત કરવાના તમામ રસ્તા બંધ કરી દેવાયા હતા.“પહેલો સવાલ એ છે કે મેં ચાર હજાર કિલોમીટરની મુસાફરી શા માટે કરી? આનું કારણ એ હતું કે ભારતમાં કમ્યુનિકેશનના તમામ રસ્તાઓ બંધ કરી દેવાયા. અમે સંસદમાં બોલવાનો પ્રયાસ કર્યો, પરંતુ તેનું પ્રસારણ ન થયું. અમે મીડિયાનો સંપર્ક કર્યો, પરંતુ તેઓએ અમારી વાત સાંભળી નહીં. અમે કાનૂની સંસ્થાઓને દસ્તાવેજો પણ સબમિટ કર્યા હતા, પરંતુ કોઈ પરિણામ આવ્યું ન હતું.
તો આ કારણે યોજી યાત્રા…?
દરેક જગ્યાએ રસ્તાઓ બંધ થઇ ગયા હતા. જનતા સુધી કેવી રીતે પહોંચવું તે સમજાતું ન હતું. ત્યારે અચાનક મારા મનમાં વિચાર આવ્યો કે જો મીડિયા અને સંસ્થાઓ જનતા સાથે જોડાવા માટેનું માધ્યમ ન બની શકે તો મારે સીધું જનતાની વચ્ચે જવું પડશે. આ માટેનો શ્રેષ્ઠ માર્ગ સમગ્ર દેશમાં પગપાળા મુસાફરી કરવાનો હતો અને મેં એ જ કર્યું.