ફેશન ડિઝાઇનર અને એક્ટ્રેસ મસાબા ગુપ્તા હાલ પ્રેગનેન્ટ છે અને બાળકની આવવાની રાહ જોઈ રહી છે
Mumbai, તા.૨૦
ફેશન ડિઝાઇનર અને એક્ટ્રેસ મસાબા ગુપ્તા હાલ પ્રેગનેન્ટ છે અને બાળકની આવવાની રાહ જોઈ રહી છે. તાજેતરમાં એક પોડકાસ્ટ ઇન્ટરવ્યૂમાં મસાબાએ તેને શ્યામ નહીં પણ રૂપાળું બાળક જન્મે તે માટે લોકોએ કેટલી વિચિત્ર વિચિત્ર સલાહ આપી તે અંગે વાત કરી હતી. મસાબાએ કહ્યું કે હમણાં જ કોઈ આવેલું અને તેને કહ્યું,“તારે રોજ રસગુલ્લા ખાવા જોઈએ કારણ કે તારું બાળક તારા કરતાં રૂપાળું હોવું જોઈએ.” ત્યાર બાદ માસાબાએ ૧૫ દિવસ પહેલાં જ બનેલો એક કિસ્સો શેર કર્યો હતો, જ્યાં મસાબાને મસાજ કરતી વ્યક્તિએ કહ્યું,“આપ ના દૂધ પીયા કરો. સાંવલા નહીં હોના ચાહીએ.” મસાબાએ કહ્યું કે લોકો તેની સામે આવા નિવેદનો એટલા નિર્દોષભાવે કરે છે કે, તે તેમની સામે વિરોધ પણ દર્શાવી શકતી નથી. આ મુદ્દે મસાબા માને છે કે તે પોતાના બાળકનો ઉછેર એટલો છૂટથી કરવા માગે છે કે તેને ભવિષ્યમાં આવા નિવેદનોની કોઈ જ અસર ન થાય. મસાબાએ આગળ કહ્યું, લોકો કાનાફુસી કરીને આ પ્રકારની વાતો કરે છે કારણ કે તેમને ખબર છે કે આ પ્રકારની વાતો યોગ્ય નથી છતાં એ લોકો આ વાતો કરવાની છોડતા નથી. “લોકો માને છે કે કોઇને કાળી કહેવાથી તેઓ કોઈને નીચું ગણાવી શકશે, મને એ બહુ વિચિત્ર લાગે છે.” મસાબા કહે છે કે મસાજ કરનાર વ્યક્તિને અવગણી એક વખત તો પણ એવા શિક્ષિત, સમૃદ્ધ અને સારુ વાંચતા લોકો પણ આવું જ વિચારતા હોય છે. ૨૦૨૪માં પણ કશું બદલાયું નથી. મસાબાએ આ ઇન્ટરવ્યૂમાં એવું પણ કહ્યું હતું કે તેને સમગ્ર જીવન દરમિયાન રંગભેદની વિચારધારાનો સામનો કરવો પડ્યો છે, તેના પિતા વિવિયન રિચર્ડને આજે પણ એ વિચારે રડવું આવી જાય છે કે, તેમને તેમની ત્વચાના રંગના કારણે કેટલું બધું સહન કરવું પડ્યું છે. મસાબા જાણીતી અભિનેત્રી નીના ગુપ્તા અને વેસ્ટઇન્ડિઝ ક્રિકેટ ટીમના પૂર્વ કેપ્ટન વિવિયન રિચર્ડની દિકરી છે. જાન્યુઆરી ૨૦૨૩માં માસાબાએ સત્યદીપ મિશ્રા સાથે લગ્ન કર્યા છે. તેઓ બંને નેટફ્લિક્સની સિરીઝ ‘મસાબા મસાબા’માં સાથે કામ કરી ચૂક્યા છે.