Mumbai,તા.08
ભારતીય ટીમના સ્ટાર ઓલરાઉન્ડર અક્ષર પટેલ પિતા બનવાના છે. તેની પત્ની મેહાની સીમંત વિધિનો વીડિયો 7 ઓક્ટોબરે ઈન્સ્ટાગ્રામ પર શેર કરવામાં આવ્યો છે. જેમાં બંને આકર્ષક અંદાજમાં પોતાના પ્રથમ બાળકને આવકારતાં માતા-પિતા બનવાની ખુશીને વ્યક્ત કરી રહ્યા છે.
વડોદરામાં જાન્યુઆરી, 2023ના રોજ લગ્નના તાંતણે બંધાયેલા અક્ષર અને મેહાએ ઈન્સ્ટાગ્રામ પર આ વીડિયો રજૂ કરતાં કેપ્શન લખી હતી કે, ‘અ ગ્રેટ જોય ઈઝ કમિંગ’ (અત્યંત આનંદ આવી રહ્યો છે). દંપતિની આ જાહેરાત સાથે જ અક્ષરના ચાહકોએ શુભકામનાઓનો વરસાદ વહાવ્યો હતો. પત્ની મેહા ન્યુટ્રિશિયન અને ડાયટિશિયન છે.
અક્ષરે હાલમાં જ સંકેત આપ્યો હતો
અક્ષર બાપુએ હાલમાં જ ગ્રેટ ઈન્ડિયન કપિલ શો પર ભારતીય ક્રિકેટ ટીમ સાથે હાજરી આપી હતી. જેમાં તેણે કંઈક મહત્ત્વના સમાચાર આવવાનો સંકેત આપ્યો હતો. આ સંકેત સાથે જ ચાહકોએ અવનવી અટકળો લગાવી હતી. અને હવે ઈન્સ્ટાગ્રામ પર મેટરનિટી (સીમંત)નો વીડિયો અપલોડ કરી માતા-પિતા બનવા જઈ રહ્યા હોવાના સમાચાર આપ્યા છે.
અક્ષર પટેલ બાંગ્લાદેશ સામે બે ટેસ્ટ સિરિઝનો ભાગ રહ્યો હતો. પરંતુ 30 વર્ષીય ઓલ રાઉન્ડરને રમવાની તક મળી ન હતી. જ્યારે બાંગ્લાદેશ સામે ટી20 સિરિઝમાં તેને આરામ આપવામાં આવ્યો છે. જેથી તે તેની વિશેષ પળોને પરિવાર સાથે માણી શકે.