બુટલેગર આરીફ સોલંકીએ જથ્થો મંગાવ્યાનો ખુલાસો : શોધખોળ
Visavadar,તા,02
વિસાવદર પોલીસે મોટા કોટડા ગામની એક ઓરડીમાંથી વિદેશી દારૂની 2865 બોટલ ઝડપી પાડી છે. બુટલેગર આરીફ સોલંકીની માલિકીની જમીનમાં આવેલી ઓરડીમાં સંગ્રહ કરાયેલા દારૂના જથ્થા પર પોલીસે દરોડો પાડ્યો છે. સ્થળ પરથી બુટલેગર આરીફ સોલંકી નહિ મળી આવતા શોધખોળ શરૂ કરવામાં આવી છે. પોલીસે જાહેર કરેલી વિગત અનુસાર વિસાવદર પોલીસ મથકના પીઆઈ આર એસ પટેલ અને કોન્સ્ટેબલ રાકેશભાઈ ડોબરીયાને સંયુક્ત રીતે બાતમી મળી હતી કે, આરીફ ઇન્દ્રિશભાઈ સોલંકી રહે. મોટા કોટડાવાળાએ તેના કબ્જાની પડતર જમીનમાં આવેલી ઓરડીમાં ગેરકાયદે વિદેશી દારૂનો જથ્થો સંગ્રહ કરી રાખવામાં આવેલો છે. બાતમી મળતાની સાથે જ પીઆઈ પટેલના માર્ગદર્શનમાં પીએસઆઈ આર એસ ડામોર, કોન્સ્ટેબલ રાકેશભાઈ ડોબરીયા, દિનેશભાઇ કાછેલા, અજિતસિંહ ભાટી, હિંમતભાઈ મોરી અને રાજુભાઈ પરમારની ટીમે મોટા કોટડા ગામે દરોડો પાડ્યો હતો.
વિસાવદર પોલીસના દરોડામાં બુટલેગર આરીફ સોલંકીની માલિકીની જમીનમાં આવેલી ઓરડીમાંથી બેગપાયપર વ્હીસ્કી 180 એમએલની 2494 બોટલ, રોયલ ચેલેન્જ વ્હીસ્કી 180 એમએલની 335 બોટલ તેમજ રોયલ ચેલેન્જ વ્હીસ્કી 750 એમએલની 36 બોટલ એમ કુલ અલગ અલગ બ્રાન્ડની કુલ 2865 બોટલ જેની કિંમત રૂ. 3,01,620નો દારૂનો જથ્થો કબ્જે કરવામાં આવ્યો છે. પોલીસના દરોડા દરમિયાન હાજર નહિ મળી આવેલ બુટલેગર આરીફ સોલંકીની શોધખોળ શરૂ કરવામાં આવી છે.